Gudoomiyaha Baarlamaanka Soomaaliya Max’ed Sheekh Cismaan Jawaari ayaa ka warbixiyey waxyaabihii ay salka ku haysay booqashadii ay isaga iyo waftigiisa ku tageen wadanka Itoobiya wuxuuna sheegay iney casuumaad ka heleen gudoomiyaha baarlamaanka Itoobiya isagoona tilmaamay iney isla falanqeeyeen sidii uu labada baarlamaan u dhex mari lahaa iskaashi iyo xiriir dhab ah oo ay yeeshaan baarlamaanada Soomaaliya ito Itoobiya.

Wuxuuna sheegay in ujeedka ugu weyn ee waftiga baarlamaanka Soomaalida uu ahaa  sidii ay Itoobiya uga soo faa’iideysan lahaayeen habka ay u dhaqan galiyeen nidaamka Federaalisimka oo habka ay ku wada heshiiyeen Soomaalida kaasoo ladoonayo in dhawaan laga dhaqan galiyo gobolada dalka Soomaaliya iyo arimo kale oo ku saabsan hab maamulka wadankaas itoobiya.

Jawaari ayaa sheegay in socdaalkii ay ku tageen magaalada Jigjiga ee xarunta dowlad deegaanka Soomaalida Itoobiya inuu la xiriiro u kuurgalida horu marka ka socda deegaanka Soomaalida Itoobiya wuxuuna sheegay Max’ed Sheekh Cismaan Jawaari inuu ku arkay deegaanka Soomaalida Itoobiya horu mar baaxad leh oo uu sheegay inaan ereyo lagu sifeyn karin sida uu hadalka u yiri.

Gudoomiyaha baarlamaanka Soomaaliya ayaa sheegay in waxyaabaha uu u riyaaqay intii uu ku sugnaa deegaanadaas ay ka mid yihiin in dhamaan masuuliyiinta dowlad deegaanka ay yihiin dad dhalinyaro ah oo ay cajiib tahay sida ay uga go’antahay horu marinta deegaanadooda,wuxuuna sheegay in deegaanka ay ka jiraan horu maro ka qota dheer sidii ay ka filayeen isagoona hadalkiisa ku daray in deegaanka Soomaalidu uu guulo ka gaaray dhinacyada  Beeraha,Jidadka,Caafimaadka,Waxbarashada,Korontada  iyo Biyaha.