Tababaraha kooxda Manchester United ayaa weerar ku qaaday Newcastle iyo tababaraheeda Alan Pardew ka dib kulankii ay 4-3 kaga badiyeen ee ka dhacay Old Trafford.

Sir Alex Ferguson ayaa ka badbaaday in lagu ciqaabo murankii uu la galay garsoore Mike Dean iyo caawiyayaashiisa ka dib markii uu ogolaaday goolkii labaad ee Newcastle oo uu iska dhaliyay Jonny Evans inkastoo markii hore offside loo diiday.

Tababaraha Newcastle ayaana ku dhaleeceeyay garsoore Mike Dean inuusan taribuunka saarin Ferguson kulankaas madaama uu muran iyo qeylo sameeyay, isagoo sheegay in uu ka xumaaday inuusan wax talaabo ah qaadin Dean oo xitaa aan warbixintiisa ciyaarta ku xusin dhacdadaas.

Si kastaba 70 jirkaan ayaa haatan dib isaga weeraray dhigiisa Newcastle, isagoo sheegay in Alan Pardew uu yahay ninka ugu xun ee garsoore wax u geysta isagoo tusaale u soo qaatay kulankii Tottenham iyo Newcastle markaasoo uu Pardew kala tuuray calanwade.

Sir Alex ayaa u sheegay suxufiyiinta maanta: “Pardew waxa uu kala tuuray garsoore ka dibna uu kaftan ka dhigay, ka dib waxa uu leeyahay damiirka uu aniga igu dhaleeceeyo. Waa wax aan la rumeysan karin.

“Waa ninka ugu xun ee garsoorayaasha ku dhegdhega. Shaqaalihiisa oo dhan ayaa sidaasi sameeya ciyaar kasta. Kulankii arbacada sidaas ayuu sameeynayay ciyaarta oo dhan.”

Tababaraha Red Devils ayaa markaasi ka dib ka hadlay sida kooxdiisa ay u tahay koox weyn islamarkaana Newcastle ay u tahay koox yar oo waqooyi bari England ka dhisan.

“Waa nasiibdarro laakiin waxaan ahay tababaraha kooxda ugu caansan adduunka, ma ahi tababare Newcastle oo ah koox yar oo ka dhisan waqooyi bari.” ayuu hadalkiisa raaciyay.

“Waxaan ahaa mid mudaaharaadayay, mar walbana sidaas ayaan ahay. Qof walba ayaa og. Waxaan ahay nin qiiro leh. Laakiin ma aheyn mid aflagaado iyo xumaan ku kaca, kaliya waan ku qeylinayay Mike.”