Dowlada Japan ayaa qorshaynaysa sidii deg deg gantaalaha difaaca sawaariikhda ee [Patriot]ka loo yaqaano ay ugu rakibaan jasiirada dhinaca koonfureed ee dalkaas ku taala, ee Okinawa, si looga hor tago, weeraro gantaalo ah oo laga cabsi qabo in Kuuriyada Waqooyi ku soo weerarto.

Talaabadan ayaa ka danbaysay ka dib markii maamulka Pyongyang ee ka taliya waqooyiga Kuuriya ay shaaca ka qaadeen in dabayaaqada bishan aynu ku jirno, ee December ay hawada u gami doonaan dayax gacmeed kuwa gantaalaha xambaara ah.

Sida wararka laga helayo dalka Japan ay ku waramayaan, waxa gantaalahan (Patriot)-ka laga rari doonaa, saldhig ciidamada bada ee dalka Japan ay ku leeyihiin gobolka, Hiroshima, waxaana sida qorshuhu yahay gantaalahan lagu baahin doona jasiiradaha dhinaca koonfureed ee dalka Japan ku yaala, gaar ahaan kuwa lagu wado in ay dul maraan gantaalka Kuuriyada Waqooyi.

Sida uu ku waramay afhayeen u hadlay ciidamada Maraykanka ee ku sugan waqooyiga Kuuriya, Dayax Gacmeedkan Kuuriyada Waqooyi Dirayso ayaa la sheegay, inuu sito oo uu xambaaranayo gantaalo kuwa wax burburiya ah, oo haddii weerar lagu soo qaado ay ugu talo gashay inay difaacaan, kuwaas oo sida afhayeenka Maraykanka u hadlay oo lagu magacaabo, Victoria Nolan sheegtay in ay halis ku tahay, kana soo hor jeedo qaraarkii golaha ammaanka ee Qaramada Midoobay ka soo baxay ee tirsigiisu ahaa, 1718 iyo 1874.