Kulankan oo ahaa mid lagaga hadlayey arimaha la xidhiidha deegaanka iyo dhowrista deegaanka ayaa galabta ka dhacay Magaalada Buuhoodle ee xarunta Gobolka Cayn, iyadoona kulankani ay kasoo qayb galeen madax ka kala socotay Ururada NADO, Saxan Saxo, Sahan, Sool, Sanaag iyo Hawd, Qurba joog, Gudoomiyaha Jaamacada Bariga Afrika faraceeda Magaalada Buuhoodle, Qaar kamida maamulayaasha dugsiyada kala duwan ee ka jira Magaalada Buuhoodle, Waxgarad, Culumo awdiin, Qaar kamida Bahda Caafimaadka ee Gobolka Cayn, Haween, Dhalinyaro, iyo Marti sharaf kale oo aad u tira badan.

Hadaba kulankani oo ahaa mid balaadhan isla markaasna lagu daah furay aayaadka quraanka kariimka ee qowlka eebo iyo wacdi diiniya ayaa waxaa ugu horeynba goobtaasi ka hadlay Maxamed Ismaaciil Maxamuud oo ah gudoomiyaha Ururka NADO, isagoona ka war bixiyey waxqabadkii uu ururka NADO ka qabtay guud ahaanba mandaqada Gobolka Cayn.

Sidoo kale Gudoomiyaha ayaa wax ka xusay sababaha keenay in gudaha Magaalada Buuhoodle laga hirgaliyo beer weyn taas oo lagu kaydiyo dhirta noocyadeeda kala duwan isla markaasna ay beertani ku timi wada tashi badan oo dhex maray xubnaha ururka si loo yareeyo dabar goynta dhirta loogana hortago nabaad guurka dhulka.

C/laahi Jaamac Kayd oo isna ah Sper Visor-ka ururka Saxan Saxo oo halkaasi ka hadlay ayaa isna ku qoto dheeraaday muhiimada ay dhirtu u leedahay aadanaha, isagoona isla goobtaasi kasoo jeediyey erayo dar daaran ah iyo in cid walba oo kasoo qayb gashay kulankani la siinayo geed dhir ah oo noocuu doono ah isla markaas ahaan taana  lagaga xisaabtami doono cid walba geedka la siiyo sida ay u xanaanayso.

Waxaa sidoo kale isla kulankaasi ka hadlay Nadiif oo kamid ah ururka Sahan, isagoona ku nuux nuuxsaday qiimaha ay leedahay waxbarashadu waxyaabo badana ka iftiimiyey farqiga u dhaxeeya aqoon la’aanta iyo aqoonta.

Faadumo Wayrax oo iyana kamid ah bahda caafimaadka Gobolka Cayn oo halkaasi ka hadashay ayaa hadaladeeda diirada ku saartay arimaha caafimaadka iyo sida loogu baahan yahay dhalinyaro ama jiil cusub oo iyagu tukha khus u leh caafimaadka, iyadoona sheegtay in ay muhiim tahay in helo dhalinyaro wax badan ka taqaana caafimaadka.

Jaamac Xasan oo isna kamid ah qurba joogta ku sugan Magaalada Buuhoodle oo ka hadlay isla kulankani ayaa wax lagu farxo ku tilmaamay sida wanaagsan ee ay kulkani ay soo qaban qaabiyeen ururada NADO, Sahana, iyo Saxan Saxo, isagoona ku booriyey dad weynihii kulkani kasoo qayb galay inay wax ka bartaan.

Gudoomiyaha Jaamacada Bariga Afrika faraceeda Magaalada Buuhoodle Dr. C/shaafi Axmed Cali oo ugu dambeyntii soo af meeray kulkani ayaa geestiisa si weyn u soo dhoweeyey kulankani lagaga Hadlayey arimaha deegaanka iyo dhowrista deegaanka, isagoona balan qaaday ka Jaamacad ahaan inay kuliyad cusub oo caafimaad ah ay kusoo kordhin doonaan Jaamacada isla markaasna ay dad badan ka faa’iidaysan doonaan fursadaasi.

Halkan Ka Daawo Sawiro

Si kastaba ha ahaatee kulani ayaa kusoo dhawaaday jawi dagan, iyadoona cid walba oo kasoo qayb gashay kulani ay si weyn u soo dhowaysay qaabka ugu haboon ee loo dhowrayo deegaanka loogana ilaalinaya nabaad guurka, waxaana ugu dambeyntii la gudoonsiiyey cid walba oo ku sugan isla goobta kulankani ka dhacay geed dhir ah si uu ugu beerto qof walba gurigiisa isla markaasna uu u yaaraado nabaad guurka dhulku.